ბლოგი მოამზადა: ირაკლი ჯიქია და ლიკა ვაწინძე
„ერთად შეკრება დასაწყისია, ერთად
დარჩენა პროგრესი, ერთად მუშაობა წარმატება“
ჰენრი ფორდი
ახლოვდება პროექტ „მერის სათათბირო ორგანო - ახალგაზრდული საბჭოს“
შედეგების პრეზენტაცია და ჩვინი შრომისუნარიანობაც ერთიორად
გაზრდილია, რადგან დიდ პასუხისმგებლობას ვგრძნობთ მერის, ქალაქისა თუ
პროექტის ორგანიზატორების წინაშე. ბატონი ირაკლი უცხოეთში ყოფნის გამო
ვერ ახერხებს სათათბიროსთან ერთად იყოს ამ ჩვენთვის საპასუხისმგებლო
დღეს, თუმცა მისი გამამხნევებელი სიტყვები ბოლო შეხვედრაზე თითოეულ
ჩვენგანს გვმატებს მუშაობის ჟინსა თუ შემართებას.
2015 წლის 24 აპრილა, 14:00 საათი - სასტუმრო „თბილისი მერიოტში“ ვართ სამოქალაქო განვითარების ინსტიტუტის პროექტის „მერის სათათბირო ორგანოს - ახალგაზრდული საბჭოს დაფუძნება“ შედეგების პრეზენტაციაზე. ყველა ფაციფუცობს და განსაკუთრებულად ემზადება პრეზენტაციისთვის.
პროექტი განხორციელდა საქართველოს ხუთ ქალაქში: გორში, თელავში, ახალციხეში, ქუთაისსა და ზუგდიდში, როგორც შედეგებიდან ჩანს ჩვენ, ახალგაზდებმა წარმატებით ვითანამშრომლეთ ჩვენი ქალაქის არჩეულ მერებთან. თანამშრომლობის შედეგად ნაწილობრივ იცვლება ხუთივე ქალაქის იერსახე და ჩვენი მერებთან თანამშრომლობა გადადის ინსტიტუციურ ნიადაგზე.
ზუგდიდში სათათბიროს ინიციატივით დაიდგმება სტენდი (პროკრედიტ ბანკის წინ) რომელიც ფუნქციურად ძალიან დატვირთული იქნება. სტენდი საზოგადოებას ხელს შეუწყობს თავი შეიკავოს ბუნებაში უხეში ჩარევისაგან. ასევე მოქალაქეები შეძლებენ სტენდის ყუთში მოათავსონ ნებისმიერი კითხვა, პრობლემა, თხოვნა თუ ინიციატივა მერისთვის. ჩვენ სათათბიროს წევრები ყოველ 10 დღეში გავუწევთ მართვას მიღებულ ინფორმაციას და დავამუშავებთ შემოსულ წერილებს მერისთვის წარსადგენად.
პროექტი განხორციელდა ცესკოს საარჩევნო სისტემების განვითარების, რეფორმებისა და სწავლების ცენტრის მხარდაჭერით. პროექტის შედეგების პრეზენტაციას ესწრებოდა 50 სტუდენტი ზემოდ ხსენებული ქალაქებიდან, ამავე ქალაქების მუნიციპალიტეტის მერები, ბატონები ზურაბ ჯირკველიშვილი, პლატონ კალმახელიძე, გიორგი კოპაძე, შოთა მურთული ცესკოს თავმჯდომარე, ქალბატონი თამარ ჟვანია; საარჩევნო სისტემების განვითარების, რეფორმებისა და სწავლების ცენტრის დირექტორი, ქალბატონი ნათია ზაალიშვილი; ქალაქ თბილისის მერი, ბატონი დავით ნარმანია; ქალაქ თბილისის საკრებულოს თავმჯდომარე, ბატონი გიორგი ალიბეგაშვილი; საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრი, ბატონი სოზარ სუბარი; კულტურისა და ძეგლთა დაცვის მინისტრი, ბატონი მიხეილ გიორგაძე; სპორტისა და ახალგაზრდობის მინისტრის მოადგილე რატი ბრეგაძე.
ჩვენი და მერის ურთიერთობა დღითიღე უფრო საინტერესო და ნაყოფიერი ხდება. ამ ეტაპზე სათათბირო ახორციელებს გამოკითხვას ადგილობრივი მედიის როლზე საზოგადოებაში, დაგეგმილი გვაქვს მერის შეხვედრა სრულიად ზუგდიდის სტუდენტობასთან და რაც ყველაზე მთავარია სათათბირომ მიზნად დაისახა ზუგდიდში დასაქმების ფორულის ორგანიზება.
ჩვენ შეგვკრიბეს და დავიწყეთ, დავრჩით და ვაღწევთ პროგრესს, ვმუშაობთ და გვაქვს საფუძვლიანი იმედი წარმატების!